Aallaqqaasiut
Pinerluttuliortarnermut kisitsisitigut paasissutissani matumani saqqummersinneqartumi 2017-imi unnerluussinerit pinerluttuliorsimanerillu aalajangiiffigineqarsimasut ilanngunneqarput. Ukiup siulianut sanilliullugit inatsisinik unioqqutitsinerit 10,6 procentinik appariarsimapput, tamannalu Naatsorsueqqissaartarfiup nalunaarsuisarfiani 2006-imi pilersinneqarsimasumi unnerluussinerit amerlassusaasa ikinnersaraat.
Pinerluuteqarsimasut aalajangiiffigineqarnerisa naatsorsuutaanni periaaseq atorneqartoq ukiut siuliini saqqummersinneqarsimasunut naleqqiullugu nutarsarneqarpoq. Taamaasilluni pinerluuteqarsimasutut pasineqartup pinerluuteqarsimanermut aalajangiiffigineqannginnermi nalunaarsorneqarnera imaluunniit minnerpaamik pinerluuteqarsimanermut pasineqartutut ulloq nalunaarsorneqarfia qulakkeerneqarpoq. Taamatuttaaq pinerluuteqarsimasutut aalajangiiffigineqarsimasut, saqqummersitani siuliini ”aalajangiiffigineqarsimasut” kisitsisitigut paasissutissaanni saqqummiunneqartarsimasut erseqqissarneqarput. Allannguutit taaguutinut immikkoortumi nassuiarneqarput. Kisitsisitigut paasissutissat Nunanut Avannarlernut allanut sanilliunneqarsinnaalernissaat pillugu allannguisoqarpoq.
Pinerluttuliortarnermut kisitsisitigut paasissutissiineq kalaallit pinerluttulerinermi inatsisaannik unioqqutitsinernik, immikkut inatsisinik unioqqutitsinernik aammalu angallannermut inatsimmik unioqqutitsinernik tunngaveqarpoq. Pinerluttuliortarnermilu kisitsisitigut paasissutissani sammisat unioqqutitsinermi unnerluussinermit pasineqarnernut aammalu aalajangiinernut suliat ingerlaarnerannut ersersitsisunik immikkoortitersimapput.
Pinerluttuliortarnermi kisitsisitigut paasissutissani unnerluussinerit aammalu pasineqarnerit amerlassusaat naatsorsorneqarput. Unnerluussineq ataaseq tassaavoq pinerluuteqarneq ataaseq (inatsimmik unioqqutitsineq ataaseq), inuillu arlaliusinnaapput (unioqqutitsisullu ilaannai imaluunniit tamakkerlutik aalajangiiffigineqarsinnaallutik). Paasisaqarnerorusukkuit periaatsip immikkoortua takuuk.
Saqqummersitami sammisat suliarineqartut tassaapput:
· Unnerluussinernut kisitsisitigut paasissutissat
o Unnerluussinerit pasineqarnermik kinguneqartut
o Unnerluussinerit aalajangiinermik kinguneqartut
· Pinerluttuliorsimanernut aalajangiinerit
o Inuusuttut pinerlunniartarnerat
o Utoqqaassuseq, suiaassuserlu
· Periaaseq uppernarsaanerlu